మెదక్, డిసెంబర్ 10 (globelmedianews.com)
మహత్మాగాంధీ జాతీయ గ్రామీణ ఉపాధి హామీ పథకం ద్వారా వచ్చే ఆర్థిక సంవత్సరం 2020 -21లో గ్రామాల్లో చేపట్టాల్సిన పనుల గుర్తింపు ఫైనల్‌‌కు చేరుకుంది. ఇప్పటికే రాష్ట్రంలోని మెజార్టీ గ్రామాల్లో సర్పంచ్‌‌లు, పంచాయతీ కార్యదర్శులు గ్రామసభలు నిర్వహించి చేయాల్సిన పనుల లిస్ట్ రెడీ చేశారు. గ్రామాల్లో భూమి లేని నిరుపేదలతోపాటు సన్నకారు రైతులకు ఉపాధి కల్పించేందుకు 200 రోజుల పనికి ప్లాన్లు వేశారు. సాధారణంగా ఉపాధి హామీ పథకంలో చేపట్టబోయే పనులను ఆర్థిక సంవత్సరం ప్రారంభానికి మూడు, నాలుగు నెలల ముందే గుర్తిస్తారు. 2019 -20లో 7,39,700 పనులను గుర్తించగా ఇప్పటి వరకు 3,00,757 పనులు  చేపట్టారు. మిగిలినవి ఏడాది మార్చి చివరి నాటికి చేయాల్సి ఉంది. అలాగే 2020-2021 ఆర్థిక సంవత్సరంలో గ్రామాల్లో చేయాల్సిన పనులను గత రెండు నెలలుగా గుర్తిస్తున్నారు. 
ఉపాధి పనుల బాధ్యత పంచాయితీలకే

ఈ పనుల సంఖ్య సుమారు 8 లక్షలు దాటే అవకాశముందని ఉపాధి పథకం ఉన్నతాధికారి ఒకరు వెల్లడించారు. పనుల కోసం రూపొందించే బడ్జెట్‌‌ ప్రతిపాదనల్లో 60 శాతం కూలీల వేతనాలకు, 40 శాతం మెటీరియల్‌‌ ఉండేలా ప్రణాళికలు రూపొందించాలని కేంద్ర గ్రామీణాభివృద్ధి శాఖ ఇప్పటికే ఆర్డర్లు ఇచ్చింది.స్థానిక అవసరాలకు అనుగుణంగా పనులను ఎంపిక చేస్తున్నారు. ఇలా 30 రకాల పనులను చేపట్టే అవకాశముంది. పనుల్లో వ్యక్తిగత ఆస్తుల పనులు, సామూహిక అవసరాలకు ఉపయోగపడే పనులు అని రెండు రకాలు ఉన్నాయి. గతంలో పనులను ఫీల్డ్‌‌ అసిస్టెంట్లు, టెక్నికల్‌‌ అసిస్టెంట్లు, ఏపీఎంలు గుర్తించేవారు. ఈ సారి మాత్రం సర్పంచ్‌‌, వార్డు సభ్యులు, ఎంపీటీసీలు, జెడ్పీటీసీలు, ఎంపీపీలు, మహిళా సంఘాల ప్రతినిధులు, గ్రామపంచాయతీ కార్యదర్శి, ఉపాధి హామీ సిబ్బంది కలిసి ఎంపిక చేస్తున్నారు.రాష్ట్రంలో మొత్తం 55,34,966 కుటుంబాలకు జాబ్‌‌కార్డులు ఉన్నాయి. కిందటేడాది 2,10,983 కుటుంబాలకు మాత్రమే 100 రోజుల పని కల్పించగా.. ఈ ఏడాది ఇప్పటి వరకు 1,15,644 కూలీలకు కల్పించారు. అంటే వంద రోజుల పని పొందినవాళ్లు నాలుగు శాతం కూడా మించలేదంటే చట్టం అమలుతీరు ఏ స్థాయిలో ఉందో అర్థం చేసుకోవచ్చు.

ఉపాధి పనుల బాధ్యత పంచాయితీలకే

సిద్దిపేట డిసెంబర్ 9  (globelmedianews.com)
సిద్దిపేట పట్టణంలో  వైద్య కళాశాల వద్ద   హరితహారంలో భాగంగా నాటిన మొక్క ను టాటా సుమో వాహనం ఢీ కొట్టడంతో చెట్టు పడిపోయింది. దీనిని సమీపంలో ఉన్న పోలీసులు గమనించి హరితహారం అధికారి ఐలయ్య కు సమాచారం ఇవ్వడం తో అక్కడికి చేరుకున్న ఐలయ్య వాహన దారుడు రాకేష్ కి  తొమ్మిది వేల ఐదు వందల జరిమానా విధించారు.
చెట్టు ని "ఢీకొట్టిన "వాహన దారునికి   9,500 జరిమానా

హరితహారం లో భాగంగా పెంచుతున్న మొక్కలకు నెలకు లక్షల రూపాయలు వెచ్చించి వాటిని కాపాడుతున్నామని, వాటికీ ఎవరు హాని కలిగించిన జరిమానా చెల్లించాల్సిందే నని హెచ్చరించారు. మంత్రి  హరీశ్ రావు ఆదేశాల మేరకు సిద్దిపేట ని హరిత సిద్దిపేట గా మార్చడమే ద్వేయంగా ముందుకు సాగుతున్నట్టు తెలిపారు

చెట్టు ని "ఢీకొట్టిన "వాహన దారునికి 9,500 జరిమానా

వానకాలం సీజన్‌లో తగ్గిన సాగు విస్తీర్ణం..
అకాల వర్షాలతో పడిపోయిన దిగుబడి
హైదరాబాద్‌ డిసెంబర్ 9  (globelmedianews.com)
 ఉల్లిధరలు బెంబేలెత్తిస్తున్నాయి. రాష్ట్రంలో నవంబర్‌ మొదట్లోనే రూ.40 పలికిన ఉల్లిగడ్డ.. రెండు వందలకు తాకింది. ఈసారి వానకాలం సీజన్‌ ప్రారంభంలో వర్షాలు లేక ఉల్లిసాగు తగ్గిందని, వేసిన కొద్దిపాటి పంటకూడా అక్టోబర్‌లో పడిన అకాల వర్షాలతో దెబ్బతిన్నదని వ్యవసాయ, మార్కెటింగ్‌వర్గాలు చెప్తున్నాయి. పంట పూర్తిస్థాయిలో అందుబాటులోకి వచ్చేందుకు ఇంకా 20 రోజులకు పైగానే పట్టవచ్చని పేర్కొన్నాయి. వానకాలంలో రాష్ట్రంలో ఉల్లిసాగు సాధారణ విస్తీర్ణం 13,094 ఎకరాలు కాగా.. ఈసారి 4,084 ఎకరాల్లోనే పంట వేశారు. ఈ పంట కూడా అక్టోబర్‌లో కురిసిన భారీవర్షాలతో భారీగా దెబ్బతిన్నది. సాగుఏకంగా 69 శాతం తగ్గిపోవడం, వేసిన పంటలోనూ దిగుబడి తగ్గడం ఇబ్బందికరంగా మారిందని మార్కెటింగ్‌వర్గాలు చెప్తున్నాయి. 
రాష్ట్రంలో తగ్గని ఉల్లి ఘాటు..

ఉల్లిగడ్డ అధికంగా పండించే మహారాష్ట్రలోనూ ఇదే పరిస్థితి నెలకొన్నది. అక్కడ అక్టోబర్‌లో వర్షాలకు పంట మొత్తం దెబ్బతినడంతో దానిని తీసేసి.. మళ్లీ సాగుచేశారు. ఆ పంట డిసెంబర్‌ చివరకు కానీ చేతికి వచ్చే అవకాశం లేదు. దేశంలోనే అతిపెద్ద ఉల్లి మార్కెట్‌ అయిన నాసిక్‌ జిల్లా లాసల్‌గావ్‌లో ఉల్లి హోల్‌సేల్‌ ధరలు రెట్టింపయ్యాయి. నంబర్‌వన్‌ క్వాలిటీ ధర క్వింటాల్‌కురూ.8 వేల వరకు పలుకుతున్నది. పెద్ద ఉల్లిగడ్డలు పాతస్టాక్‌ కిలో రూ.100 దాటింది. నవంబర్‌ మొదటివారంలో మొదటి రకం ఉల్లిగడ్డ రూ.25 నుంచి రూ.35 ధర పలికింది. గతేడాది నంబర్‌వన్క్రం గరిష్ఠంగా రూ.19 వరకు పలికింది. ఉల్లికి మార్కెట్‌లో పలుకుతున్న ధర నేపథ్యంలో రైతులు గడ్డ పూర్తిగా ఊరకముందే పంట తీసి మార్కెట్‌కు తరలిస్తున్నారు. దీంతో పచ్చి, చిన్నగడ్డ ఉల్లి మార్కెట్‌కు ఎక్కువగా వస్తున్నది. ప్రస్తుతం ఉల్లి దిగుబడి తగ్గవచ్చనే అంచనాల నేపథ్యంలో ధరలు ఇప్పట్లో తగ్గే అవకాశం లేదని మార్కెటింగ్‌ వర్గాలుచెప్తున్నాయి. హైదరాబాద్‌ బహిరంగ మార్కెట్‌లో మొదటిరకం ఉల్లిని రూ.140 వరకు విక్రయిస్తున్నారు. పదిరోజుల కిందటి వరకు రోజూ 70 నుంచి 100 లారీల లోడ్‌ వచ్చేదని, ధర పెరగడంతో ఇతర రాష్ట్రాల నుంచి దిగుమతి పెరిగిందని మలక్‌పేట మార్కెట్‌ అధికారులు పేర్కొన్నారు. మరోవైపు రాష్ట్రంలో ఉల్లి ధరలను నియంత్రించేందుకు మార్కెటింగ్‌శాఖ చర్యలు చేపట్టింది. ఉల్లి వ్యాపారుల సహకారంతో రైతుబజార్లలో రూ.40లకు ఒక్కొక్కరికి కిలో చొప్పున పంపిణీ చేస్తున్నది. హైదరాబాద్‌లోని ఫలక్‌నుమా, వనస్థలిపురం, సరూర్‌నగర్‌ రైతు మార్కెట్లలో ఈ ఏర్పాట్లుచేసింది.రాష్ట్రానికి ఉల్లిగడ్డ దిగుమతిగుజరాత్‌, మహారాష్ట్ర, కర్ణాటక రాష్ట్రాలతోపాటు ఏపీలోని కర్నూలు, అనంతపురం నుంచి ఉల్లిగడ్డ దిగుమతి అవుతున్నది. రాష్ట్రంలోని మహబూబ్‌నగర్‌, జోగుళాంబ గద్వాల, మెదక్‌, నారాయణఖేడ్‌ ప్రాంతాల్లో ఉల్లిసాగు చేస్తారు. ఈసారి వికారాబాద్‌ జిల్లాలోని తాండూరు, మెదక్‌ జిల్లాలోని నారాయణ్‌ఖేడ్‌, మహబూబ్‌నగర్‌ జిల్లాలోని కొల్లాపూర్‌, అలంపూర్‌, నల్లగొండ జిల్లాలోని కొన్నిప్రాంతాల్లో మాత్రమే ఉల్లి సాగుచేశారు. ఏటా ఆగస్టు, సెప్టెంబర్‌, అక్టోబర్‌ మధ్య ఉల్లి దిగుబడి వస్తుంది. నవంబర్‌ నుంచి మార్చి వరకు కర్ణాటక నుంచి, రోజువారీగా మహారాష్ట్రలోని నాసిక్‌ నుంచి దిగుమతి అవుతుంది. దేశవ్యాప్తంగా నెలకొన్న ఉల్లిగడ్డ కొరతను నివారించేందుకు కేంద్రం తగిన చర్యలు చేపట్టింది. టర్కీ, బ్రెజిల్‌ దేశాల నుంచి ఉల్లిగడ్డను దిగుమతి చేసుకొన్న కేంద్రం రాష్ట్రానికి 1500 మెట్రిక్‌ టన్నులు కేటాయించింది.కొద్దిరోజులుగా ఆకాశాన్నంటుతున్న ఉల్లిధర నుంచి నగరవాసికి కొద్దిగా ఊరట లభించనున్నది. ఇతర రాష్ర్టాల నుంచి హైదరాబాద్‌కు ఈ వారం భారీగా ఉల్లి రానున్నది. దేశవ్యాప్తంగా ఉల్లి ధర రోజురోజుకూ పెరిగిపోతున్నది. రాష్ట్రంలోనూ హోల్‌సేల్‌ మార్కెట్‌లోనే రూ.100 దాటింది. దీంతో ప్రభుత్వం పరిష్కారంవైపు దృష్టి సారించింది. ఇప్పటికే హైదరాబాద్‌లోని కొన్ని రైతుబజార్లలో ఒక్కొక్కరికి కిలో చొప్పున రూ.40 కే అందించేందుకు చర్యలు చేపట్టిన ప్రభుత్వం.. ఇతర రాష్ర్టాల నుంచి పెద్దమొత్తంలో ఉల్లిని దిగుమతి చేసుకోనున్నది. మహారాష్ట్ర, కర్ణాటక, గుజరాత్‌ నుంచి హైదరాబాద్‌కు చెందిన వ్యాపారుల సహకారంతో దాదాపు 5 వందల మెట్రిక్‌ టన్నుల ఉల్లిని తీసుకురానున్నది.

రాష్ట్రంలో తగ్గని ఉల్లి ఘాటు..

విజయవాడ, డిసెంబర్ 9 (globelmedianews.com)
ఏపీ రాజకీయ చక్రం ఇప్పుడు రోజుకో మలుపు తిరుగుతుంది టిడిపిని మరింత పతనం చేయడమే బిజెపి పక్కా వ్యూహం గా కనిపిస్తుంది. దానికి అనుగుణంగా పావులు కదుపుతున్న తీరు ఇది స్పష్టమైన సంకేతాలనే పంపిస్తుంది. జనసేన ను టిడిపికి దూరంగా జరగాలని ఇప్పటికే సూచనలు అందాయన్న ప్రచారం సాగుతోంది.. చంద్రబాబుకు రాబోయే రోజుల్లో ఏ ఒక్క రాజకీయ పార్టీలో సపోర్ట్ లేకుండా బిజెపి వ్యూహకర్తలు నరుక్కొస్తున్నారు.గత ఎన్నికల ముందు కామ్రేడ్ లతో కలిసి ప్రయాణించిన జనసేన పై ఇప్పుడు ఆ రెండు పార్టీలు ఆగ్రహంతో ఉన్నాయి. 
టార్గెట్ టీడీపీ గా బీజేపీ

ఎన్నికల తరువాత అంతంత మాత్రంగా ఉన్న కమ్యూనిస్టు ల జనసేన సంబంధాలు అమిత్ షాకు అనుకూలంగా పవన్ ఎప్పుడైతే వ్యాఖ్యలు చేశారో నాటి నుంచి మరింత దిగజారాయి. ఎపి లో జనసేన మనుగడ ఇక ప్రశ్నర్ధకమే అని సిపిఎం మధు వ్యాఖ్యానించడం గమనిస్తే భవిష్యత్తులో కామ్రేడ్ లు ఇక పవన్ ను పూర్తి దూరం పెట్టక తప్పని పరిస్థితి ఎదురైంది. విశాఖ ఇసుక లాంగ్ మార్చ్ వరకు బాగానే ఉన్న వీరి బంధం బద్దలు కావడంతో కొత్త రాజకీయ సమీకరణాలు తధ్యమని తేలుతుంది.భారతీయ జనతా పార్టీ మాత్రం చంద్రబాబును క్రమంగా వీక్ చేస్తే తాము లాభపడవచ్చని భావిస్తుంది. ఎన్నికలకు ఇంకా సమయం ఉండటంతో క్రమేపీ టీడీపీని బలహీన పర్చాలన్నది కమలం పార్టీ వ్యూహంగా తెలుస్తోంది. బిజెపి దారిలోకి రాకపోతే చంద్రబాబుకు ఉన్న ఆప్షన్ ఒక్కటే. తన పాత మిత్రులు కమ్యూనిస్టు లను కలుపుకుని వెళ్లడమే. ఇక కాంగ్రెస్ ను గత తెలంగాణ ఎన్నికల ముందే దగ్గర చేసుకున్న నేపథ్యంలో వారితో కూడా ఆయన అడుగులు వేసే అవకాశాలే కనిపిస్తున్నాయి. అయితే కాంగ్రెస్ తో ప్రయాణం చంద్రబాబుకు ఏపీ లో నష్టం తెస్తుందా లాభం తెచ్చేదా అన్నది కాలమే తేల్చాలి.

టార్గెట్ టీడీపీ గా బీజేపీ

హైద్రాబాద్, డిసెంబర్ 9 (globelmedianews.com)
వజ్ర ఏసీ బస్సుకు ఆర్టీసీ టాటా చెప్పేసింది. వజ్ర సర్వీసును ఉపసంహరించుకోవాలని నిర్ణయించింది. ఏసీ వసతితో ఉండే ఈ మినీ బస్సులను ఇక సరుకు రవాణా బస్సులుగా మార్చాలని నిర్ణయించింది.బస్టాండ్ల వరకు వెళ్లాల్సిన అవసరం లేకుండా కాలనీల్లోనే బస్సు ఎక్కే వసతి కల్పిస్తూ ప్రవేశపెట్టిన బస్సు సర్వీసుల నుంచి నష్టాలు వెల్లువెత్తుతున్నాయి.మరికొద్ది రోజుల్లో వాటి సేవలను నిలిపివేయనుంది. ముఖ్యమంత్రి ఆలోచనల మేరకు సదుద్దేశంతో ప్రారంభించిన ఆ సర్వీసులు కొన్ని లోపాల వల్ల ప్రయాణికుల ఆదరణకు నోచుకోలేదు. ఖాళీగా పరుగుపెడుతూ చివరకు రూ.12 కోట్ల మేర నష్టాలు మోసుకురావటంతో వాటిని వదిలించుకోవాలని నిర్ణయించింది. ఈ మేరకు ముఖ్యమంత్రి కేసీఆర్‌ అనుమతితో వజ్ర సర్వీసులను ఆర్టీసీ ఉపసంహరించుకుంటోంది.
ఇక వజ్ర కధ కంచికే

ఆర్టీసీని నిర్వహించటం సాధ్యం కాదని దాదాపు తేల్చేసి ఆ తర్వాత మనసు మార్చుకుని సంస్థను కొనసాగించాలని నిర్ణయించిన ముఖ్యమంత్రి చంద్రశేఖర్‌రావు ఇప్పుడు దానిపై ప్రత్యేక దృష్టి సారించారు. ఈ క్రమంలో ఆర్టీసీ ఆదాయాన్ని పెంచేందుకు సరుకు రవాణా సేవలను ప్రారంభించాలని నిర్ణయించారు. ఇప్పటికే ప్రైవేటు సంస్థతో కలసి పార్శిల్‌ సర్వీసును ఆర్టీసీ కొనసాగిస్తోంది. దాన్ని పూర్తిస్థాయి సరుకు రవాణాగా మార్చాలని సీఎం ఆదేశించారు. ఇందుకోసం తొలుత 1,200 బస్సులను సరుకు రవాణాకు కేటాయించాలని తాజాగా ఆర్టీసీ నిర్ణయించింది.నగరంలో నష్టాలు మోసుకొస్తున్నాయన్న ఉద్దేశంతో వేయి సిటీ బస్సులను ఉపసంహరించుకోవాలని ఇప్పటికే నిర్ణయించిన సంగతి తెలిసిందే. ఈ వేయి బస్సులను సరుకు రవాణా విభాగానికి మార్చాలని దాదాపు నిర్ణయించింది. వాటికి మరో 200 బస్సులను చేర్చనుంది. అందులో భాగంగా, ప్రస్తుతం అందుబాటులో ఉన్న 58 వజ్ర ఏసీ బస్సులను కూడా వాటికే కేటాయించాలని అధికారులు నిర్ణయించారు. వాటిల్లోని సీట్లను తొలగించి సరుకు రవాణాకు వీలుగా మార్చనున్నారు.కానీ దీన్ని జనం ఆదరించలేదు. బస్సుల నాణ్యత కూడా సరిగా లేదని, ప్రయాణం ఇబ్బందిగా ఉందని ఫిర్యాదులొచ్చాయి. బస్టాండ్లకు వెళ్లకపోవటం పెద్ద మైనస్‌గా మారింది. ఇక గరుడ బస్‌ కంటే దీని టికెట్‌ ధర ఎక్కువగా ఉండటం మరో ప్రధాన ఫిర్యాదు. సిటీ డిపోల నుంచి తొలగించి వరంగల్, నిజామాబాద్‌ డిపోలకు కేటాయించినా తీరు మారలేదు. శ్రీశైలం, యాదగిరిగుట్ట, కర్నూలు లాంటి ప్రాంతాలకు నడిపినా.. చివరకు డిపోలకు వెళ్లేలా చేసినా.. యాప్‌తో సంబంధం లేకుండా నేరుగా డ్రైవరే టికెట్‌ ఇచ్చినా జనం వాటిని పట్టించుకోలేదు.  వాటి రూపంలో రూ.12 కోట్ల మేర నష్టాలు రావడంతో వాటికి సెలవు చెప్పాల్సిన సమయం వచ్చింది.

ఇక వజ్ర కధ కంచికే

హైద్రాబాద్, డిసెంబర్9 (globelmedianews.com)
లుగు ఎంపీ సీట్లు సాధించడంతో, తెలంగాణపై ప్రత్యేక ఫోకస్ పెట్టింది బీజేపీ అధినాయకత్వం. దీంతో రాష్ట్ర బీజేపీని పరుగులు పెట్టే అధ్యక్షుని కోసం కసరత్తు చేస్తోంది. అధ్యక్షుడి కోసం ఇప్పటికే అభిప్రాయ సేక‌ర‌ణ జోరుగా సాగుతోంది. అధ్యక్ష పీఠం ద‌క్కించుకునేందుకు ఎవరి ప్రయ‌త్నాలు వారు ముమ్మరం చేశారు. ప్రస్తుత అధ్యక్షుడు ల‌క్ష్మణ్ తో పాటు మరికొంత మంది నేతలు అధ్యక్ష పదవి కోసం పోటీ పడుతున్నారు. మరికొద్ది రోజుల్లో ఈ ప్రక్రియ‌ను పూర్తిచేసేందుకు అధిష్టానం క‌ర‌స‌ర‌త్తులు చేస్తోంది. ఈ నేపథ్యంలో కొంతమంది సీనియర్‌ నేతల ఢిల్లీ పయనం ఆసక్తి కలిగిస్తోంది. మరోసారి తనను అధ్యక్షుడిగా కొనసాగించాలని లక్ష్మణ్ బలంగా కోరుకుంటున్నారన్న చర్చ పార్టీ వర్గాల్లో జోరుగా సాగుతోంది. ఈ నేపథ్యంలోనే ఆయన ఈమధ్య ఢిల్లీ కూడా వెళ్లారు. 
టీబీజేపీ బాస్ ఎవరు...?

పార్టీ పెద్దలను కలిశారు. అధ్యక్ష పదవి చేపట్టిన నాటి నుంచి చేసిన కార్యక్రమాలు, పార్టీ బలోపేతానికి చేపట్టిన చర్యలు తదితర వివరాలను ఢిల్లీ పెద్దలకు వివరించేందుకే ఆయన ఢిల్లీ వెళ్లినట్లు ఒక వర్గం నేతలు చెప్పారు. ప్రధాని మోడీ, జాతీయ అధ్యక్షుడు అమిత్ షా లక్ష్మణ్ పని తీరుపై సంతృప్తిగా ఉన్నారని, మరోవైపు పార్టీ వర్కింగ్ ప్రెసిడెంట్ జేపీ నడ్డా, లక్ష్మణ్‌కు అత్యంత సన్నిహితుడు కాబట్టి ఇవన్నీ ఆయనకు కలిసొస్తాయని ఆయన సన్నిహితులు చెప్తున్నారు. అయితే, ఈ సమయంలో మళ్లీ ఒకసారి ఢిల్లీ స్థాయిలో ప్రయత్నాలు చేస్తే మంచిదని భావించిన లక్ష్మణ్, ఢిల్లీలో పర్యటించారన్న టాక్ వినిపిస్తోంది. లక్ష్మణ్ మాత్రం తాను రాష్ట్రానికి రావాల్సిన నిధులు,ప్రాజెక్ట్ లపై కేంద్ర మంత్రులకు విజ్ఞప్తి చేయడానికే వెళ్లినట్లు చెప్పారు. అయితే పార్టీలోని ఓ వర్గం మాత్రం తన అధ్యక్ష పదవిని రెన్యూవల్ చేసేందుకు అవసరమైన గ్రౌండ్ వర్క్ చేసుకోవడానికే ఢిల్లీ వెళ్లి ఉంటారని చెప్పుకుంటున్నారు. ఇలా లక్ష్మణ్‌, ఢిల్లీలో తన ప్రయత్నాలు చేస్తుంటే, మరికొందరు నేతలు కూడా, అధ్యక్ష రేసులో తాము సైతం ఉన్నామంటూ రకరకాల మార్గాల ద్వారా లాబీయింగ్ చేస్తున్నారు. మరోవైపు స్టేట్ బీజేపీ పీఠం కోసం ఇతర నేతలు కూడా గట్టిగా పావులు కదుపుతున్నారని తెలుస్తోంది. నిజామాబాద్‌ పార్లమెంట్‌ ఎన్నికల్లో ఏకంగా సీఎం కేసీఆర్ కూతురు కవితను ఓడించి, జాతీయస్థాయిలో అందరి దృష్టినీ ఆకర్షించిన ఎంపీ ధర్మపురి అర్వింద్‌ పేరును కూడా, చాలామంది అధ్యక్ష పదవికి సూచిస్తున్నట్టు వార్తలొస్తున్నాయి. అర్వింద్‌కు పార్టీ పగ్గాలు అప్పగిస్తే, పార్టీ మరింత దూకుడుగా ముందుకెళుతుందని, అధిష్టానానికి కొందరు సీనియర్లు చెబుతున్నారట. ఇక కరీంనగర్‌ పార్లమెంట్‌ ఎన్నికల్లో గెలిచి, ఫైర్‌ బ్రాండ్‌ లీడర్‌గా పాపులర్ అవుతున్న బండి సంజయ్ సైతం, అధ్యక్ష పదవి కోసం ఢిల్లీ స్థాయిలో లాబీయింగ్ చేస్తున్నట్టు ప్రచారం జరుగుతోంది. కొందరు సీనియర్ల ద్వారా, ఆయన పావులు కదుపుతున్నట్ట కార్యకర్తలు మాట్లాడుకుంటున్నారు. మరోవైపు మాజీ మంత్రి డీకే అరుణ పేరు కూడా బీజేపీ ప్రెసిడెంట్‌ రేసులో ప్రముఖంగా వినిపిస్తోంది. మహిళా నేత కావడం, కేసీఆర్‌పై ముందు నుంచి దూకుడుగా మాట్లాడే నాయకురాలు కావడంతో సహజంగానే ఆమె పేరు తెరపైకి వస్తోంది. డీకే అరుణకు పగ్గాలు అప్పగిస్తే, ఇతర కాంగ్రెస్ నాయకులు సైతం బీజేపీకి క్యూ కడతారని, క్షేత్రస్థాయిలో కొత్త క్యాడర్‌ పార్టీకి జత కలుస్తుందని కొందరు అరుణ పేరును సూచిస్తున్నారట. బీజేపీ వ్యూహకర్త రాంమాధవ్ ఆశీస్సులు కూడా అరుణకు వున్నాయని కార్యకర్తలు మాట్లాడుకుంటున్నారు. మరోవైపు బీజేపీ సీనియర్ నేత మురళీధర్ రావు కూడా, ప్రెసిడెంట్ పదవి కోసం హస్తినస్థాయిలో లాబీయింగ్ చేస్తున్నట్టు చర్చ జరుగుతోంది. ఇలా ఎవరికి వారు బీజేపీ అధ్యక్ష పీఠం కోసం పావులు కదుపుతున్నారు. అయితే, అధ్యక్షుని ఎంపికపై పార్టీ మొత్తం గ్రూపులుగా విడిపోయిందన్న మాటలు వినిపిస్తున్నాయి. పార్టీలోకి కొత్తగా వచ్చినవారికి, అధ్యక్ష పదవి ఇవ్వొద్దని కొందరు డిమాండ్ చేస్తున్నారు. బీజేపీ సిద్దాంతాలకు కట్టుబడి, దశాబ్దాలుగా పార్టీ కోసం పని చేస్తున్నవారికి అవకాశం ఇవ్వాలని సీనియర్లు అధిష్టానానికి విన్నవిస్తున్నారు. అయితే, కొత్తవారైనా, పాతవారైనా సమర్థులుండాలని, పార్టీ ఎదుగుతున్న క్రమంలో, కొత్త నీరు అవసరమని కూడా, మరికొందరు అమిత్‌ షాకు చెబుతున్నారట. ఇలా పాతకొత్త గొడవలు, చాలాపేర్లు తెరపైకి వస్తుండటంతో, ఎవరిని ఎంపిక చేస్తే, ఏమవుతుందోనని, కాషాయ అధిష్టానం తలలు పట్టుకుంటోందట. చూడాలి, తెలంగాణ బీజేపీ అధ్యక్ష సింహాసనంపై ఎవరు కూర్చుంటారో, ఆ తర్వాత పార్టీలో పరిణామాలు ఏం జరుగుతాయో.

టీబీజేపీ బాస్ ఎవరు...?

అదిలాబాద్, డిసెంబర్ 9, (globelmedianews.com)
కవ్వాల్‌ టైగర్‌జోన్‌లోని జన్నారం అటవి డివిజన్‌లో టైగర్‌జోన్‌ లో నుంచి కలప తరలిపోకుండా రాత్రి పూట వాహనాల రాకపోకలను జరుపకుండా ముత్యంపేట్, తపాలపూర్, పాడ్వాపూర్, కొత్తగూడం, కలమడుగు  లలో అటవి చెక్‌పోస్టులు ఏర్పాటు చేశారు. పగలంతా కలప తరలిపోకుండా చూడటమె కాకుండా రాత్రి 9 గంటల నుంచి ఉదయం 6 గంటల వరకు భారీ వాహానాలను టైగర్‌జోన్‌ లో పర్యటన నిషేదించారు. చెక్‌పోస్టుల వద్ద సీసీ కెమెరాలను అమర్చి నిఘా పెట్టారు. గతంలో సీసీ కెమరాలను అమర్చిన వాటి ప్రసారం కేవలం చెక్‌పోస్టు వద్దనే ఉండేది. అయితే ఎఫ్‌డీవో మాధవరావు చెక్‌పోస్టు వద్ద అమర్చిన సీసీ పుటేజీలు తన కార్యాలయంలో, తన మోబైల్‌లో కనిపించేలా తగు ఏర్పాట్లను చేసుకున్నారు. 
తరలిపోతున్న అటవీ సంపద

దీంతో చెక్‌పోస్టుల నిర్వహణపై ప్రతి రోజు, ఖాళీ సమయంలో మోబైల్‌ లో లేదా, తన కార్యాలయంలోని కంప్యూటర్‌లో పరిశీలిస్తున్నారు. గతంలో ఏదైన అవకతవకలు జరిగే క్రమంలో సదరు సిబ్బంది చెక్‌పోస్టు వద్ద కెమరాను బందు చేసి వాహనం వెళ్లాక తిరిగి ఆన్‌ చేసే అవకాశం ఉండేది ఎందుకంటే కెమరాలోని వివరాలు అక్కడే అమర్చిన కంప్యూటర్లో రికార్డు అయ్యేది. వాటిని అధికారులు ఎప్పుడో ఒక్కసారి పరిశీలించేవారు. కాని ఇప్పుడు ఇక కెమరాలను ఆపి వేసే వీలు కూడ ఉండదు. కొన్ని సమయాల్లో వాహానాలను వదిలిపెడితే అప్పుడే ఫోన్‌ చేసి అడిగి అనుమానం నివృత్తి చేసుకునే వీలుంటుంది. దీంతో భయానికి చెక్‌పోస్టు వద్ద ఉండే సిబ్బంది అక్రమాలకు పాల్పడే అవకాశం ఉండదుచెక్‌పోస్టు డ్యూటీ దినం, తప్పించి దినం ఇద్దరే చేసే వారు. ఇద్దరే ఉండటం వల్ల  రాత్రి పూట ఇసుక తరలించే వారి వాహానాల వద్ద ఎంతో కొంత తీసుకుని వాటిని వదిలివేయడం, ముందుగానే కలప తరలించే వ్యక్తులు డ్యూటీ చేసే వారితో మాట్లాడి కలప దాటించడం జరిగేది. ఇటివల అనేక వాహనాలను చెక్‌పోస్టులు దాటి లక్షేట్టిపేట్‌ వెళ్తుండగా పట్టుకున్న సంఘటనలు ఉన్నాయి. ఇటివల మామిడిపెల్లి నుంచి వ్యాన్‌లో కలప చెక్‌పోస్టులు దాటి వెళుతుండగా లక్షేట్టిపేట్‌ వద్ద పోలీసులు పట్టుకున్నారు. అదే విధంగా చెక్‌పోస్టు దాటించెందుకు వెళ్తుండగా జన్నారం అటవి అధికారులు ఒక కారును పట్టుకున్నారు. ఇలాంటి సంఘటనలను దృష్టిలో పెట్టుకుని మార్పులు తీసుకువచ్చారు.డ్యూటీ ఇద్దరికే ఇవ్వడం వల్ల వారితో స్మగ్లర్లు మచ్చిక చేసుకుని కలప తరలిస్తున్నారనే విషయాన్ని గమనించిన అటవిశాఖ ఎఫ్‌డీవో మాధవరావు నూతన డ్యూటీ విధానానికి తెరదించాడు. చెక్‌పోస్టు డ్యూటీ ఇద్దరికే కాకుండా డివిజన్‌ పరిధిలోని బీట్‌ అధికారులకు అందరికి వేయాలని యోచించాడు. డివిజన్‌లోని బీట్‌ అధికారికి   ఒక గంట ముందే సమాచారం ఇచ్చి డ్యూటీ చేయాలనే ఆదేశాలను ఇస్తున్నారు. దీంతో చెక్‌పోస్టు వద్ద ఎవ్వరు డ్యూటీ చేస్తారో అనే విషయం స్మగ్లర్లకు తెలియకుండా ఉంటుంది. తనకు డ్యూటీ ఉంటుందనే విషయం ఆ బీట్‌ అధికారికే తెలియని పరిస్థితి ఉంటున్నందున అక్రమాలు జరిగే అవకాశం లేదు. అదే విధంగా గతంలో చెక్‌పోస్టు డ్యుటీలు చేసిన వారు కూడ తిరిగి బీట్‌లలో వెళ్లాల్సి ఉంటుంది. ఒకే రోజు డ్యూటి ఉంటున్నందున తన ఉద్యోగాన్ని ఫణంగా పెట్టి ఎలాంటి అవకతవకలకు పాల్పడే అవకాశం ఉండదనేది అధికారుల ఆలొచన.చెక్‌పోస్టుల వద్ద పని చేసే సిబ్బంది ఒక్కరోజు మాత్రమే ఉండటం వల్ల తనిఖీలలో అక్రమాలు జరిగే అవకాశం లేదు. ఇలాంటి సమూల మార్పుల వల్ల ఫలితాలు ఎలా ఉంటాయో వేచి చూడాలి.

తరలిపోతున్న అటవీ సంపద