ఆధార్ తో 90 వేల కోట్ల ఆదా

 

ముంబై, జూలై 13 (globelmedianews.com)  
ఈ ఏడాది మార్చి 31 నాటికి ప్ర‌త్య‌క్ష న‌గ‌దు బ‌దిలీకి ఆధార్ వాడిన కార‌ణంగా ప్ర‌భుత్వానికి రూ.90,000 కోట్ల వ‌ర‌కూ ఆదా అయిన‌ట్లు యూఐడీఏఐ అంచ‌నా వేసింది. దేశంలో రోజుకు సగటున 3 కోట్ల మంది ఆధార్‌ను వినియోగిస్తున్నారని యూనిక్‌ ఐడెంటిఫికేషన్‌ అథారిటీ ఆఫ్‌ ఇండియా (యూఐడీఏఐ– ఆధార్‌) చైర్‌పర్సన్‌ డాక్టర్‌ జె.సత్యనారాయణ చెప్పారు. దాదాపు దేశంలో ఇప్ప‌టికి 121 కోట్ల మందికి ఆధార్ కార్డులు జారీ అయ్యాయని అన్నారు. ప్ర‌స్తుతం రేషన్, పింఛ‌ను, ఉపాధి హామీ, ఉప‌కార వేత‌నాలు వంటి వాటికి ఎక్కువగా ఆధార్‌ను వాడుతున్నారు. ఇండియన్‌ స్కూల్‌ ఆఫ్‌ బిజినెస్‌లో (ఐఎస్‌బీ) డిజిటల్‌ ఐడెంటిటీ అనే అంశంపై మూడు రోజుల అంతర్జాతీయ సదస్సును ప్రారంభించిన సందర్భంగా ఆయన మాట్లాడుతూ.. ‘‘ఆధార్‌ వినియోగంతో రాబడులు కూడా ఎక్కువే. పెట్రోలియం అండ్‌ నేచురల్‌ గ్యాస్, ప్ర‌జా ఆహారం పంపిణీ, రూరల్‌ డెవలప్‌మెంట్‌ వంటి విభాగాల్లో ఆధార్‌ విశ్లేషణతో రూ.90 వేల కోట్లు ఆదా అయ్యాయి’’ అని వివరించారు. డిజిటల్‌ ఐడెంటిటీలో మరింత పరిశోధనలు అవసరమన్నారు. బయో మెట్రిక్‌ గుర్తింపు, ఆధార్‌ భద్రత, నమోదు, నవీకరణల్లో మరింత పారదర్శకత, సమర్థత తీసుకొచ్చేందుకు విస్తృత పరిశోధనలు చేస్తున్నామని చెప్పారు. ఆధార్ డేటా చాలా భ‌ద్రంగా,సుర‌క్షితంగా ఉంద‌ని.. బెంగుళూరు, మ‌నేస‌ర్ ప్రాంతాల్లో 7000 స‌ర్వ‌ర్లు ఇందుకోసం ఉప‌యోగిస్తున్నామ‌ని వెల్ల‌డించారు.
 
 
 
ఆధార్ తో 90 వేల కోట్ల ఆదా

No comments:
Write comments