దారి తప్పిన అవిశ్వాసం బీజేపీ ఎదురు దాడితో టీడీపీ డైలమా

 

న్యూఢిల్లీ, జూలై 21 (globelmedianews.com)
బీజేపీ మోసం చేసింది..’ అనేది తెలుగుదేశం పార్టీ వాదన. విభజన హామీల అమలు, ప్రత్యేకహోదా.. ఈ అంశాలపై భారతీయ జనతా పార్టీ మోసం చేసిందని, అందుకే ఎన్డీయే నుంచి బయటకు వచ్చినట్టుగా ఇది వరకే ప్రకటించిన టీడీపీ, అవిశ్వాస తీర్మానంతో బీజేపీని ఇరకాటంలో పెట్టే ప్రయత్నంతో లోక్‌సభ స్పీకర్‌కు నోటీసులు ఇవ్వడం, వెనువెంటనే అవిశ్వాస తీర్మానం చర్చకు రావడం చకచకా జరిగిపో యింది. చర్చ కూడా పూర్తి అయ్యింది. ఈ తీర్మానంతో బీజేపీని ఇరకాటంలో పడేయాలనేది తెలుగుదేశం పార్టీ రాజకీయ ఉద్దేశం. తెలుగుదేశం పార్టీ అనుకున్నది జరిగిందా? మోడీ మోసం చేశారన్న తన వాదనను తెలుగుదేశం పార్టీ హైలెట్ చేసుకోగలిగిందా? తద్వారా ఏపీలో పొలిటికల్‌గా మైలేజ్‌ను సాధించిందా? అనే అంశాలను పరిశీలిస్తే... అవిశ్వాసంపై చర్చలో తెలుగుదేశం పార్టీ లేవనెత్తిన అంశాలను భారతీయ జనతా పార్టీ ఒకే మాటతో తిప్పి కొట్టింది. ప్రత్యేకహోదా అంశంలో ప్రధాని ఇచ్చిన సమాధానంతో తెలుగుదేశం పార్టీనే కొంచెం డిఫెన్స్‌లో పడింది. హోదా బదులు ప్యాకేజీకి గతంలోనే టీడీపీ అధినేత చంద్రబాబు నాయుడు ఒప్పుకున్నారని, ఆ మేరకు అసెంబ్లీలో ధన్యవాద తీర్మానాన్ని కూడా పాస్ చేశారని ప్రధాని ప్రస్తావించడం.. అంత వరకూ వాడీవేడీగా మాట్లాడిన టీడీపీ నేతల ఆవేశంపై నీళ్లు చల్లినట్టుగా అయ్యింది. 
 
 
 
దారి తప్పిన అవిశ్వాసం
బీజేపీ ఎదురు దాడితో టీడీపీ డైలమా
 
హోదా వద్దు అని ఒప్పుకున్నారని, మళ్లీ ఇప్పుడు యూటర్న్ తీసుకుంటున్నారని మోడీ తన ప్రసంగంతో తెలుగుదేశం పార్టీని ఇరకాటంలో పడేశారు. ఇక అంతకన్నా ముందు కేంద్ర హోం శాఖ మంత్రి రాజ్‌నాథ్ సింగ్ మాట్లాడుతూ.. చంద్రబాబు తమకు మిత్రుడే అని వ్యాఖ్యానించడం కూడా టీడీపీని కొంచెం ఇబ్బంది పెట్టింది. బీజేపీపై టీడీపీ వీరావేశాన్ని ప్రదర్శిస్తున్న సమయంలో బాబు తమకు మిత్రుడే అని అంటూ రాజ్‌నాథ్ వ్యాఖ్యానించారు. ఇలా రాజ్‌నాథ్ ఒక రూట్లో రాగా, మోడీ మరో రూట్లో వచ్చి టీడీపీని కార్నర్ చేశారు. గతంలో ప్రత్యేకహోదా వద్దని చంద్రబాబు గట్టిగా చెప్పి ఉండటం చేత ఈ విషయంలో తెలుగుదేశం పార్టీకి కౌంటర్లు ఇచ్చే అవకాశం లేకుండా పోయింది. ఇక గల్లా జయదేవ్ వంటి వాళ్లు నిన్న సభలో గట్టిగా మాట్లాడినా, ఇది వరకూ ఆయనే హోదా వద్దు, ప్యాకేజీ మేలు అని చేసిన ప్రకటనలు మైనస్ పాయింట్లు అవుతున్నాయి. సోషల్ మీడియాలో గల్లా గత ప్రకటనలు వైరల్ గా మారాయిప్పుడు. ఇక కాంగ్రెస్ పార్టీ చర్చను పూర్తిగా పక్కదారి పట్టించింది. ఏపీకి ప్రత్యేకహోదా విషయంలో ఈ తీర్మానం చర్చకు వచ్చిందని అనుకుంటే, రాహుల్ గాంధీ తన ప్రసంగంలో ఏపీ ప్రస్తావన పెద్దగా తీసుకురాకపోవడం విశేషం. హోదా విషయంలో రాహుల్ గట్టిగా మాట్లాడలేదు అని విశ్లేషకులు అంటున్నారు. వేరే అంశాలను రాహుల్ చర్చలోకి తీసుకొచ్చి చర్చను అటు వైపు తీసుకెళ్లారు. బీజేపీ వాటికి సమాధానం ఇచ్చింది. ఇక రాహుల్ కన్ను గీటడం, కౌగిలింతతో.. అసలు విషయాల కన్నా ఈ కొసరు విషయాలకు ఎక్కువ ప్రచారం వచ్చింది. ఈ విధంగా మోడీ ప్రభుత్వం పై తొలి సారిచర్చకు వచ్చిన అవిశ్వాస తీర్మానం బీజేపీని పెద్దగా ఇరకాటంలో పెట్టలేకపోయిందని చెప్పాలి. ఏపీకి ప్రత్యేక హోదా ఇస్తామని బీజేపీ గత ఎన్నికల ముందు హామీ ఇచ్చింది. అయితే తమతో కలిసి ఎన్డీయేలో ఉండిన టీడీపీ అప్పుడు హోదా వద్దని అందని, ఇప్పుడు కావాలని అంటోందంటూ.. బీజేపీ తెలివిగా ఈ అంశంపై ఎదురుదాడి చేసింది.

No comments:
Write comments