తెలుగు రాష్ట్రాల్లో ... గోపీల టెన్షన్

 

హైద్రాబాద్, మార్చి 18,(globelmedianews.com)
ఈ గట్టునుంటావా.. ఆ గట్టునుంటావా’’ అనే పాట ఈసారి ఓటర్లకు వర్తించదు. ప్రస్తుతం జంపింగ్‌ల సీజన్ నడుస్తున్న నేపథ్యంలో.. ఆ గట్టుకు ఈ గట్టుకు మధ్య ఉండే గోపీలకు సరిగ్గా సరిపోతుంది. ఒకప్పుడు పార్టీలు మారడాన్ని పెద్ద ప్రహసనంగా భావించేవారు. ఓటర్ల తీర్పును గౌరవించి ప్రతిపక్షంలోనే కొనసాగేవారు. కానీ, ఇప్పుడు రోజులు మారాయ్.  ప్రతి ఒక్కరికీ ప్రజా సేవ (?) చేయాలనే తపన పెరిగిపోతోంది. ప్రతిపక్షంలో ఉండి ప్రజా సమస్యలపై పోరాడటం కంటే.. అధికార పార్టీలో ఉండటం బెటర్ అనుకుంటున్నారు. దీన్ని కూడా వారు ప్రజా సేవగానే భావిస్తున్నారు. పోనీ, అధికార పార్టీలో ఉండి ప్రజలకు ఏమైనా మేలు చేస్తున్నారా అంటే అదీ ప్రశ్నార్థకమే. కొంతమంది నేతలు తమ సొంత ఇంటిని చక్కబెట్టుకోడానికి అధికార పార్టీల్లోకి జంపింగ్‌లు చేయడం సాధారణమైపోయింది.  ఇక ఎన్నికల సమయంలో ఈ పరిస్థితి మరింత అరాచకంగా ఉంటుంది. వర్షా కాలంలో కప్పల్లా.. గాలి ఎటు వీస్తుందని తెలిస్తే అటు వెళ్లిపోవడం సర్వసాధారణమైపోయింది. 


తెలుగు రాష్ట్రాల్లో ... గోపీల టెన్షన్

పార్టీలు తమ బలాన్ని పెంచుకోడానికి ఈ కప్పదాట్లను ప్రోత్సహిస్తున్నాయి. కొన్ని పార్టీలైతే వీటి కోసం ప్రత్యేక ప్యాకేజీలను అందుబాటులోకి తెస్తున్నాయని తెలుస్తోంది. ఇది ఎంతవరకు వాస్తవమో తెలీదు గానీ, పార్టీలను చూసి ఓటేసిన ఓటర్లకు మాత్రం ఇది పెద్ద దెబ్బే. ఓటర్లు ఏ పార్టిని నమ్మి ఓటేసి ఆ నేతను గెలిపిస్తారో.. ఆ నేత మరో పార్టీ తీర్థం పుచ్చుకుని వారిని అపహాస్యం చేయడం ఈ రోజుల్లో సాధారణంగా మారింది. ఒకప్పుడు కార్యకర్తలతో మాట్లాడిన తర్వాతే పార్టీలు మారేవారు. కానీ, ఇప్పుడు కార్యకర్తలు సైతం నోరు వెళ్లబెట్టేలా కప్పదాట్లు ఉంటున్నాయి. ఓ నాయకుడు గత కొన్నేళ్లుగా పార్టీలు మారుతూ అధికార పార్టీలో మంత్రి పదవులను అనుభవిస్తుంటే, మరికొందరు అధికార పార్టీలో ఉంటే చాలు.. పబ్బం గడుపుకోవచ్చనే ఉద్దేశంతో కండువాలు మారుస్తున్నారు. ‘‘మొన్న ఆ నేత దొంగ’’ అన్నవాడే.. ఈ రోజు ‘‘ఆ నేత దొంగ కాదు దొర’’ అంటూ వత్తసుపలికే నేతలను చూసి ఊసరవిల్లులు సైతం సిగ్గుపడుతున్నాయి.
కొంతమంది ఎన్నికల్లో ఒక పార్టీ నుంచి బరిలో దిగుతారు. ప్రత్యర్థిపై నిప్పులు కురిపిస్తారు. విజయం తర్వాత వారి పార్టీ అధికారంలోకి రాకపోతే.. నెమ్మదిగా తట్టాబుట్టా సర్దేసి అధికార పార్టీలోకి చేరిపోతారు. వీరి ప్రజల సెంటిమెంటు, విశ్వాసంతో పని ఉండదు. ప్రజల మేలు కోసం, ప్రజల మంచికే తాను పార్టీ మారాననే సాకు చెబుతారు. ఆ పేరుతో ఐదేళ్లు అధికార పార్టీలో పబ్బం గడుపుకుంటారు. ఒక పార్టీ గుర్తుతో గెలిచి.. ఇంకో పార్టీకి వెళ్లేవారు పదవికి రాజీనామా చేయాల్సి ఉన్నా పెద్దగా పట్టించుకోవడం లేదు. దీంతో కప్పదాట్లు ఇటీవల బాగా పెరిగాయి. దీనిపై స్పీకర్ చర్యలు తీసుకోవల్సి ఉన్నా.. అది జరగడం లేదు.  జంపింగ్ జపాంగ్స్ చాలా రకాలు ఉంటాయి. అధికారాన్ని రుచిమరిగి ప్రతిపక్షంలో ఐదేళ్లు ఉండటం ఇష్టంలేని నేతలు మొదటి రకం. మంచి కేడర్, ప్రజాభిమానం ఉన్న నేతలకు ప్యాకేజీలు ఆశ చూపి లాక్కోవడం రెండో రకం. నిజాయతీ ఉండే నేతలు ఈ ఆఫర్‌ను తిరస్కరిస్తారు. లేనివాళ్లు కనీస ఆలోచన లేకుండా జంప్ చేస్తారు. ఇక మూడోరకం నేతల్లో కేసుల భయం ఎక్కువ. ఏ పార్టీ అధికారంలోకి వస్తే ఆ పార్టీ ఆ పార్టీలోకి వెళ్లిపోడానికి సిద్ధంగా ఉంటారు. లేకపోతే తన పాత కేసులు బయటకు తీస్తారనేది వారి భయం. ఇంకొందరు వ్యాపార లావాదేవీల దృష్ట్యా అధికార పార్టీలకు దాసోహం అంటారు. మరికొందరు పదవులు రాక.. అలిగి పార్టీలు మారతారు. రాజకీయం వ్యాపారమయం కావడంతో ఈ రోజుల్లో ప్రజలను పట్టించుకునేవాడు ఒక్కడూ లేడు. ప్రజలకు రూపాయి ఆశ చూపి.. కోట్లు కొల్లగటే ఈ నేతలను నమ్మేంత కాలం రాజకీయాలు ఇలాగే ఉంటాయి. ప్రస్తుతం మన తెలుగు రాష్ట్రాల్లోని ఓటర్ల పరిస్థితి ఇలాగే ఉంది. ఈ రోజు ఒక పార్టీలో ఉండే నేత.. రేపు ఏ పార్టీలో ఉంటాడో చెప్పలేని స్థితి. ఎన్నికల తర్వాత కూడా ఈ జంపింగ్‌లు కొనసాగుతాయి. ఫలితాలు ఎటు ఉంటే అటు వాలిపోతారు. 

No comments:
Write comments