ఆగ్నేయ బంగాళాఖాతంలో అల్పపీడనం

 

విశాఖపట్టణం, ఏప్రిల్ 24 (globelmedianews.com)
ఆగ్నేయ బంగాళాఖాతంలో ఏప్రిల్ 25న ఏర్పడే అల్పపీడనం తుఫానుగా మారే అవకాశం ఉందని వాతావరణ శాఖ అధికారులు వెల్లడించారు. శ్రీలంకకు ఆగ్నేయంగా హిందూ మహాసముద్రం, దానికి ఆనుకుని ఉన్న నైరుతి బంగాళాఖాతంలో అల్పపీడనం ఏర్పడి 36 గంటల్లో వాయుగుండంగా బలపడుతుందని తెలిపారు. ఇది శ్రీలంక తూర్పు ప్రాంతం మీద వాయవ్యదిశగా తమిళనాడు వైపు ప్రయాణిస్తుందని వివరించారు. అనంతరం 48 గంటల వ్యవధిలో తుఫానుగా మారుతుందని తెలియజేశారు. బుధవారం కోస్తాలో ఒకట్రెండుచోట్ల ఉరుములు, మెరుపులు, అక్కడక్కడా మోస్తరు వర్షాలు కురిసే అవకాశం ఉందని వాతావరణ శాఖ తెలిపింది. 


ఆగ్నేయ బంగాళాఖాతంలో అల్పపీడనం

ఇక, తెలంగాణలో అకాల వర్షాలు తగ్గిపోయాయని, బుధవారం నుంచి మూడు రోజుల పాటు రాష్ట్రంలో పొడి వాతావరణం ఉంటుందని హైదరాబాద్ వాతారణ కేంద్రం అధికారులు తెలిపారు. గత మూడు రోజులుగా తెలంగాణలో పలు చోట్ల వర్షాలు కురిసి, ప్రచండ గాలులు వీచాయి. హైదరాబాద్ నగరంలో సోమవారం వీచిన ప్రచండ గాలులకు హోర్డింగులు, విద్యుత్ స్తంభాలు విరిగిపడ్డాయి. ఎల్బీ స్టేడియంలో ఫ్లడ్‌లైట్ టవర్ కూలి ఒకరు మృతి చెందారు. మంగళవారం ఆదిలాబాద్‌లో అత్యధికంగా 42.3 సెల్సియస్‌ డిగ్రీల ఉష్ణోగ్రత నమోదుకాగా, హైదరాబాద్‌లో 37.8 సెల్సియస్‌ డిగ్రీలు నమోదయ్యింది. ఏప్రిల్ 24 నుంచి తెలంగాణ ప్రాంతంపై.. విదర్భ, మధ్య ప్రదేశ్, రాజస్థాన్ ప్రాంతాల నుంచి వేడిగాలులు వీచే అవకాశాలు ఉన్నాయి. దీనికితోడు ద్రోణి బలపడి.. అల్పపీడనంగా మారే క్రమంలో.. ఏపీలో చాలాచోట్ల ఉరుములు, మెరుపులతో పాటు ఈదురుగాలలతో కూడిన వర్షాలు కురిసే అవకాశం ఉంది. గంటకు 40 నుంచి 50కిలోమీటర్ల వేగంతో గాలులు వీయనున్నాయి. తెలంగాణలో వేడిగాలులు, ఏపీలో ఉరుములు, మెరుపులతో గాలులు, చల్లటి వాతావరణం ఉండనుంది. వీటన్నింటికీ తోడు క్యుములోనింబస్ ప్రభావం కూడా ఉండనున్నాయి. ఉత్తర భారతంలో ఉష్ణోగ్రతలు సాధారణం కంటే 4 నుంచి 6 డిగ్రీల మేర పెరుగుతాయని అన్నారు. దీని ప్రభావంతో గుజరాత్, రాజస్థాన్ రాష్ట్రాల్లో వడగాల్పులు వీస్తాయని అన్నారు. 

No comments:
Write comments