గన్నవరంలో రాజకీయం గరం గరం...

 

విజయవాడ, మే 6, (globelmedianews.com)
ఎన్నికల హీట్ తగ్గినా.. కృష్ణా జిల్లా గన్నవరం రాజకీయం గరం, గరంగా మారింది. వైసీపీ-టీడీపీ అభ్యర్థుల మధ్య వార్ మరింత ముదిరింది. టీడీపీ అభ్యర్థి వల్లభనేని వంశీ.. వైసీపీ అభ్యర్థి యార్లగడ్డ వెంకట్రావుకు చేసిన ఫోన్‌కాల్‌తో నియోజకవర్గంలో వేడి రాజుకుంది. ఈ ఫోన్ కాల్ తర్వాత వంశీ తమను బెదిరిస్తున్నారంటూ వైసీపీ ఎమ్మెల్యే అభ్యర్థి యార్లగడ్డ వెంకట్రావు, మాజీ ఎమ్మెల్యే బాలవర్దనరావులు విజయవాడ పోలీసు కమిషనర్‌ ద్వారకాతిరుమలరావుకు ఫిర్యాదు చేశారు. వంశీ తమ ఇంటికొచ్చి సన్మానం చేస్తానంటూ ఫోన్‌ చేస్తున్నారని.. తమ ఇంటికి కూడా వచ్చినట్లు సీపీకి చెప్పారు. సీసీ టీవీ ఫుటేజీని కూడా అందజేశారు. సీన్ కట్ చేస్తే వెంకట్రావు ఫిర్యాదుపై వంశీ మళ్లీ స్పందించారు. ఈసారి లేఖ రాస్తూ కౌంటరిచ్చారు. వంశీ తన లేఖలో ‘డియర్ వెంకట్రావు.. నా గురించి నీకు అంత పరిచయం చేయాల్సిన అవసరం లేదు. 


గన్నవరంలో రాజకీయం గరం గరం...

గతంలో నీకు నేను చాలాసార్లు సాయం చేశాను. గతంలో మన మధ్య జరిగిన అన్ని విషయాలను ప్రస్తావిస్తున్నాను. నీతో సత్సంబంధాలను కొనసాగించేందుకే మీ ఇంటికి వస్తానని ఫోన్‌ చేసి చెప్పాను. అపాయింట్‌మెంట్‌ అడుగుదామని.. ఫోన్‌ చేశా.. మీరు ఇంట్లో ఉన్నారో లేదో తెలుసుకోవడానికి మా అనుచరుల్ని మీ ఇంటికి పంపా. నేను మీ ఇంటికి రావడం ఇబ్బంది అయితే మీరే మా ఇంటికి రండి. మీరు తేదీ, సమయం చెబితే నేను సిద్ధంగా ఉంటా. ఓ కప్పు కాఫీతాగి వెళ్లొచ్చు. మీ అనుచరులను కూడా మీవెంట తీసుకు రండి’. ‘మా అనుచరులను మీ ఇంటికి పంపితే.. నేను బెదిరిస్తున్నానని విజయవాడ సీపీకి ఫిర్యాదు చేసినట్టు పత్రికల్లో చూసి షాకయ్యా. మీరు నాపై నిరాధారమైన ఆరోపణలు చేశారు.. మీరు నా గురించి భయపడాల్సిన అవసరం కూడా లేదు. దేవుడున్నాడు అన్నీ ఆయనకు తెలుసు.. అందరికీ దేవుడే న్యాయం చేస్తాడు ’అన్నారు వంశీ. గతంలో వెంకట్రావుకు ఫోన్ చేసి షాకిచ్చిన వంశీ.. ఇప్పుడు లేఖ రాసి మళ్లీ ట్విస్ట్ ఇచ్చారు. ఈ లేఖకు వెంకట్రావు వర్గం ఎలా కౌంటరిస్తుందో చూడాలి. వైసీపీ అభ్యర్థి, నేతలు పరిధి దాటి వ్యక్తిగత దూషణకు దిగారని.. ప్రజాస్వామ్యంగా జరగాల్సిన ఎన్నికల్లో.. అప్రజాస్వామికమైన బాష వాడారని ఉద్దేశంతో తాను వెంకట్రావుతో మాట్లాడానన్నారు. ఒక శాలువా, ఒక దండ కొన్న మాట వాస్తవమే.. దండేస్తానని తాను చెప్పింది నిజమేనన్నారు. తన వ్యాఖ్యల్లో తప్పేముందన్న వంశీ.. ఆ సన్మానం ఏంటో వెండితెర మీద చూస్తారని సస్పెన్స్ పెంచారు. 

No comments:
Write comments