కులాల కుంపటిలో ఏపీ పోలీస్ అధికారులు

 

విజయవాడ, జూలై 17 (globelmedianews.com)
పోలీస్ డిపార్ట్‌మెంట్‌లో కులాల రచ్చ. నాడు కమ్మ, నేడు రెడ్డి. పొలిటికల్ గేమ్‌లో నలిగిపోతున్నామని డీఎస్పీలు ఆవేదన చెందుతున్నారు. ఐపీఎస్‌ల మాదిరిగా కేడర్లు ఉండి ఉంటే ఇతర రాష్ట్రాలకు వెళ్లిపోతామని డీఎస్పీలు ఆవేదన వ్యక్తం చేస్తున్నారు. పైకి చెప్పుకోలేనివిధంగా మానసిక క్షోభ అనుభవిస్తున్నారు. ఏపీ పోలీస్ డిపార్ట్‌మెంట్‌లో ఈ అంశం ఇప్పుడు పెద్ద రచ్చగా మారింది. క్రమశిక్షణ కలిగిన డిపార్ట్‌మెంట్ కావడంతో బయటకు చెప్పలేకపోతున్నా.. చాలా మంది డీఎస్పీలు ఆఫ్ ది రికార్డ్‌గా తమ సన్నిహితులు, కొంత మంది మీడియా ప్రతినిధుల ముందు వెళ్లబోస్తున్న ఆవేదన ఇదే. పొలిటికల్ పార్టీల మధ్య జరుగుతున్న రాజకీయ యుద్ధంలో తాము బలైపోతున్నామని డీఎస్పీలు చెబుతున్నారు. దేశంలో ఏ రాష్ట్రంలోనూ ఇలాంటి దుస్థితి ఉండదేమోనని అంటున్నారు. జూన్ 26న ఏపీ ప్రభుత్వం ఒకేసారి 31 మంది డీఎస్పీలను హెడ్ క్వార్టర్‌కు రిపోర్ట్ చేయాలని ఆదేశించింది. 
కులాల కుంపటిలో  ఏపీ పోలీస్ అధికారులు

పోలీస్ డిపార్ట్‌మెంట్ చరిత్రలో ఇంత పెద్దఎత్తున ఇంతకుముందెప్పుడూ ఇంతమందిని హెడ్‌క్వార్టర్‌కు రిపోర్ట్ చేయమని ఆదేశించిన చరిత్ర లేదని అధికారులు చెబుతున్నారు. ఒకవేళ ఏదైనా కారణాలతో ఇలా అధికారులను పెద్ద సంఖ్యలో హెడ్‌క్వార్టర్‌కు బదిలీ చేసినా.. వారికి వారంపది రోజుల్లోగా పోస్టింగులు ఇచ్చేవారని అంటున్నారు. కానీ, ఈ 31 మంది డీఎస్పీలకు ఇంతవరకూ పోస్టింగ్ ఇవ్వకపోవడం గమనార్హం. ఈ డీఎస్పీలను వీఆర్‌లోనే ఉంచిన ప్రభుత్వం.. అసెంబ్లీ సమావేశాల సమయాల్లో బందోబస్తుకు, వీఐపీలు వచ్చినపుడు భద్రతకు వినియోగిస్తున్నారు. వీరికి మళ్లీ పోస్టింగ్ ఇచ్చేవరకూ జీతభత్యాలు, అదనపు సౌకర్యాలు ఏవీ ఉండవు. వ్యక్తిగత వాహనం, డ్రైవర్ కూడా ఉండరు. నిన్నటి దాకా నాలుగైదు పోలీస్ స్టేషన్లకు డీఎస్పీలుగా రారాజులా వెలిగిన వీరి పరిస్థితి.. ఒక్కసారిగా తారుమారవడంతో ఆవేదన చెందుతున్నారు. చంద్రబాబు ప్రభుత్వంలో ఎన్నికల ముందు డీఎస్పీలను భారీ సంఖ్యలో బదిలీ చేశారు. వీరిలో ఎక్కువ మందికి వారికి నచ్చిన చోట పోస్టింగులు ఇచ్చారనేది ఓ ఆరోపణ. అందులో కమ్మ సామాజిక వర్గానికి చెందినవారే ఎక్కువ మంది ఉన్నారని మరో ఆరోపణ. నాడు ప్రతిపక్ష నేతగా జగన్మోహన్ రెడ్డి పలు సభల్లోనూ ఈ విషయాన్ని ప్రస్తావించారు. ఎన్నికల్లో తమకు అనుకూలంగా పనిచేసేందుకు చంద్రబాబు తన సొంత సామాజికవర్గానికి చెందినవారికి పోస్టింగులు ఇచ్చుకున్నారని జగన్ ఆరోపించారు. ఎన్నికలు ముగిసాయి. జగన్ సీఎం అయ్యారు. ఇక అప్పట్లో టీడీపీ పోస్టింగులు ఇచ్చిన డీఎస్పీలందరినీ వైఎస్సార్‌సీపీ ప్రభుత్వం బదిలీ చేసింది. అందర్నీ ఒకేసారి హెడ్‌క్వార్టర్‌కు రిపోర్ట్ చేయమన్నారు. ఇలా ట్రాన్స్‌ఫర్ అయిన అధికారుల్లో 15 మంది వరకూ కమ్మ సామాజిక వర్గానికి చెందినవారే ఉన్నట్లు తెలుస్తోంది. వీరంతా పోస్టింగ్ వస్తుందని ఎదురు చూశారు. కనీసం లూప్ లైన్ పోస్టుల్లో అయినా నియమిస్తారని భావించారు. కానీ, ఇన్ని రోజులు గడిచినా ఇంతవరకూ పోస్టింగ్ ఇవ్వకుండా వీఆర్‌లోనే పెట్టడంతో రోజురోజుకు నిరాశ పెరుగుతోంది. ఇదిలా అంశం ఇలా ఉండగానే.. ప్రభుత్వం మంగళవారం మరోసారి డీఎస్పీలను ట్రాన్స్‌ఫర్ చేస్తూ ఆదేశాలిచ్చింది. ఈసారి 38 మంది డీఎస్పీలను బదిలీ చేసింది. వీరిలో 16 మంది రెడ్డి సామాజికవర్గానికి చెందిన వారున్నారు. గతంలో కమ్మ సామాజికవర్గానికి చెందిన డీఎస్పీలు పనిచేసిన చోట ఇప్పుడు రెడ్డి సామాజికవర్గాలకు చెందిన డీఎస్పీలకు పోస్టింగులు ఇచ్చారు. ఈ అంశం వీఆర్‌లో ఉన్న డీఎస్పీలకు మరింత ఆవేదన కలిగిస్తోంది. తమకు పోస్టింగులు ఇవ్వకుండా ఒకేసారి 16 మంది రెడ్డి సామాజికవర్గానికి చెందిన వారికి పోస్టింగులు ఇవ్వడం కచ్చితంగా కులవివక్షే అంటున్నారు బాధిత డీఎస్పీలు. అప్పుడు టీడీపీ కమ్మ సామాజికవర్గానికి చెందిన వారికి పోస్టింగులు ఇచ్చిందని వైఎస్సార్‌సీపీ పదేపదే ఆరోపించింది. అదేక్రమంలో ఇప్పుడు రెడ్డి సామాజికవర్గానికి జగన్ సర్కార్ పోస్టింగులు ఇస్తుంటే టీడీపీ తమకు మద్దతుగా ఎందుకు నోరువిప్పడం లేదని ప్రశ్నిస్తున్నారు. ఇక ఇతర సామాజికవర్గాలకు చెందిన పరిస్థితి మరోలా ఉంది. తమకు ఏకంగా పనిష్మెంట్లు ఇస్తూ అవమానిస్తున్నారని వారు బాధను వ్యక్తం చేస్తున్నారు. కమ్మ సామాజికవర్గానికి చెందిన డీఎస్పీల మీద పగ, ప్రతీకారం తీర్చుకుంటున్నారు సరే.. మరి మిగిలిన 15 మంది బలహీనవర్గాలకు చెందిన డీఎస్పీలని, టీడీపీకి అనుకూలంగా ఉన్నారనే కారణాలతో వారికి పోస్టింగులు ఇవ్వలేదని చెబుతున్నారు. దీనిపై ఎవరూ నోరు మెదపడంలేదని ప్రశ్నిస్తున్నారు. దేశంలో ఏ రాష్ట్రంలో లేనివిధంగా.. రాష్ట్రంలో కులాల కుమ్ములాటలో పార్టీల మధ్య జరుగుతున్న వార్‌లో తాము నలిగిపోతున్నామని ఆవేదన వ్యక్తం చేస్తున్నారు. పొరుగు రాష్ట్రం తెలంగాణలో ఇలా కులాల వివాదం లేదని.. కేవలం పనితీరు, సామర్థ్యం ఆధారంగా పోస్టింగులు ఇస్తారని కొంత మంది అధికారులు చెబుతున్నారు. తెలంగాణలో ఏదైనా అవినీతి ఆరోపణలు వస్తేనే ఆ అధికారులను వీఆర్‌లో పంపిస్తారని.. ఇలా ఉద్దేశపూర్వకంగా కులాల ఆధారంగా వీఆర్‌లో పెట్టడం ఉండదని చెబుతున్నారు. 

No comments:
Write comments