బాబు ఇల్లు ఖాళీ చేయడం మంచిది : బొత్స

 

అమరావతి, జూలై 17, (globelmedianews.com)
కరకట్టపై అక్రమ నిర్మాణాలను కూల్చడం ఖాయమంటున్నారు ఏపీ మంత్రి బొత్స సత్యనారాయణ. మండలిలో ప్రశ్నోత్తరాల సమయంలో కరకట్టపై అక్రమ నిర్మాణాలపై టీడీపీ సభ్యులు ప్రశ్నలు సంధించారు. వైఎస్ హయాంలో కరకట్టపై నిర్మాణలకు ఎందుకు అనుమతులిచ్చారని ప్రశ్నించారు. అప్పుడు చట్టాలు గుర్తుకు రాలేదా? ఇప్పుడే గుర్తుకు వచ్చాయా అంటూ నిలదీశారు. టీడీపీ సభ్యులు అడిగిన ప్రశ్నలకు మంత్రి సమాధానం చెప్పారు. 
బాబు ఇల్లు ఖాళీ చేయడం మంచిది : బొత్స

కరకట్టపై 26 అక్రమ నిర్మాణాలను గుర్తించామని.. ప్రజా వేదిక నిర్మాణంలో నిబంధనల్ని తుంగలో తొక్కారన్నారు బొత్స. ప్రజా వేదికకు అనుమతులిచ్చిన అధికారుల నుంచే రూ.8కోట్లు వసూలు చేస్తామన్నారు. కరకట్టపై అక్రమ నిర్మాణాలకు మరోసారి నోటీసులు జారీ చేస్తామన్నారు. కరకట్టపై ఉన్న చంద్రబాబు ఇల్లు కూడా ఖాళీ చేయడం మంచిదన్నారు మంత్రి. లేదంటే చట్టం తనపని తాను చేసుకుపోతుందని.. కరకట్టపై అక్రమ నిర్మాణాలు కూల్చడం ఖాయమని తేల్చి చెప్పారు. అక్రమ నిర్మాణాలపై టీడీపీ పిటిషన్ వేసినా హైకోర్టు తిరస్కరించిన విషయాన్ని మంత్రి గుర్తు చేశారు. నదిపరివాహక ప్రాంతాల్లో అక్రమ కట్టడాల విషయంలో.. నేషనల్‌ గ్రీన్‌ ట్రిబ్యునల్‌ ఆదేశాలను కచ్చితంగా అమలు చేస్తామన్నారు మంత్రి. కృష్ణానదిని రక్షించుకోవాల్సిన బాధ్యత అందరిపై ఉందని.. నది పరివాహ ప్రాంతంలో అక్రమ కట్టడాలు నిర్మిస్తే ఊరుకునేది లేదన్నారు. 

No comments:
Write comments