మరో వివాదంలో ‘బిగ్ బాస్’ రియాలిటీ షో

 

హైద్రాబాద్, జూలై 16 (globelmedianews.com)
ప్రముఖ హీరో అక్కినేని నాగార్జున హోస్ట్‌గా వ్యవహరించనున్న ‘బిగ్ బాస్’ రియాలిటీ షో సీజన్ 3 వివాదాల్లో చిక్కుకుంది. ఇప్పటికే బిగ్ బాస్ నిర్వాహకులపై సంచలన ఆరోపణలు చేస్తూ జర్నలిస్టు శ్వేతారెడ్డి, నటి గాయత్రి గుప్తా పోలీసులకు ఫిర్యాదు చేశారు. ఈ మేరకు బంజారాహిల్స్ పోలీసులు నలుగురు నిర్వాహకులపై కేసులు కూడా నమోదు చేశారు. ఇదిలా ఉంటే, ఈ రియాలిటీ షోను పూర్తిగా నిలిపివేయాలని కోరుతూ తెలంగాణ హైకోర్టులో ప్రజా ప్రయోజన వ్యాజ్యం (పిల్) దాఖలైంది. 
మరో వివాదంలో ‘బిగ్ బాస్’ రియాలిటీ షో

హోస్ట్‌ నాగార్జునతో పాటు షో నిర్వాహకులు పదిమందిని పిటిషనర్ ప్రతివాదులుగా చేర్చారు. బిగ్ బాస్ షోను నిలిపివేయడం సాధ్యంకాని పక్షంలో రాత్రి 11 గంటల తర్వాతే ఎపిసోడ్స్‌ను ప్రసారం చేసేలా ఆదేశాలు ఇవ్వాలని పిటిషనర్ హైకోర్టును కోరారు. సినిమా మాదిరిగా ప్రతి ఎపిసోడ్ సెన్సార్ చేశాకే టీవీలో ప్రసారం చేసేలా ఆదేశాలు ఇవ్వాలని ధర్మాసనానికి విజ్ఞప్తి చేశారు. ‘బిగ్ బాస్’ బూతు షో మాదిరిగా తయారైందని, దీని ప్రభావం జనాల మీద చాలా ఉంటోందని పిటిషనర్ పేర్కొన్నారు. మరోవైపు, తమపై వివిధ పోలీస్ స్టేషన్లలో నమోదైన కేసులు కొట్టివేయాలని కోరుతూ బిగ్ బాస్ షో యాజమాన్యం తెలంగాణ హైకోర్టులో క్వాష్ పిటిషన్ వేసింది. ఈ పిటిషన్లపై హైకోర్టు ఎలా స్పందిస్తుందో చూడాలి. వాస్తవానికి ‘బిగ్ బాస్’ షో మూడో సీజన్ ఈనెల 21 నుంచి స్టార్ మా ఛానెల్‌లో ప్రసారం కానుంది. 100 రోజుల పాటు ఈ రియాలిటీ షో నడుస్తుంది. 15 మంది సెలబ్రిటీలు ఈ షోలో కంటెస్టెంట్లుగా పాల్గొంటున్నారు. 

No comments:
Write comments