జింక కేసులో అధికారుల పాత్ర...

 

నల్గొండ, ఆగస్టు 3, (globelmedianews.com - Swamy Naidu)
యాదాద్రి జిల్లా మోత్కూరు మండలం కొండాపురం చిట్టడవిలో జింకల వేట కేసులో ఒక్కొక్కటిగా వాస్తవాలు వెలుగులోకి వస్తున్నాయి. జింకల వేటలో ముగ్గురు గ్రామస్థుల ప్రమేయం ఉందని పోలీసులు అనుమానిస్తున్నారు. పరారీలో ఉన్న వీరి కోసం ఫారెస్టు అధికారులు, పోలీసులు గాలిస్తున్నారు. వారు దొరికితేనే అన్ని విషయాలు వెలుగులోకి వస్తాయని పోలీసులు చెబుతున్నారు. కాగా, ఇక్కడ జింకల వేట ఎప్పటినుంచో కొనసాగుతుందని, పోలీసులకు కూడా ఆ విషయం తెలుసని గ్రామస్థులు చెబుతున్నారు. తాజాగా జింకను చంపిన వ్యవహారం వెలుగులోకి రావడంతో పోలీసులు, ఫారెస్ట్ అధికారులు సంయుక్తంగా విచారణ జరుపుతున్నారు. గుండాల-కొండాపురం మధ్య చిట్టడవి ఉంది. దీనికి ఆనుకొని పొలాలు ఉన్నాయి.

 జింక కేసులో అధికారుల పాత్ర...
జింకలు, నెమళ్లు ఈ పొలాల్లోకి వస్తుంటాయి. ఇదే అదనుగా వాటిని వేటాడటం కోసం కొందరు గ్రామస్థులు తమ పొలాల్లో ఉచ్చులు బిగించేవారు. నెమళ్లు, జింకలు ఉచ్చులో పడిన వెంటనే వాటిని చంపివేసి పార్టీ చేసుకునేవారు. కొద్ది రోజుల క్రితం దశరథ్ పొలంలో ఏర్పాటు చేసిన ఉచ్చులో జింక పడింది. జింక ఉచ్చులో చిక్కుకున్న విషయం తెలిసిన కొందరు దాన్ని వదిలేయాలని దశరథ్‌కు సూచించారు. దీనికి సరేనన్న అతడు.. వారు వెళ్లిపోగానే రాములు, నరసింహ‌లతో కలిసి జింకను చంపేశాడు. జింక మాంసాన్ని పంచుకున్న ఈ ముగ్గురు.. కొంతమంది రాజకీయ నాయకులు కూడా పంపించారు. జింకను ఎవరో సమాచారం అందడంతో ఫారెస్టు అధికారులు రంగంలోకి దిగారు. ఘటనా స్థలి వద్ద ఎముకలతో పాటు ఉచ్చులను స్వాధీనం చేసుకున్నారు. జింకను చంపిన బరిసెలను కూడా అధికారులు స్వాధీనం చేసుకున్నారు. ప్రస్తుతానికి దశరథ్, రాములు, నరసింహలు పరారీలో ఉన్నారని పోలీసులు చెబుతున్నారు. ఈ ముగ్గురిని పట్టుకునేందుకు ప్రయత్నాలు ప్రారంభించారు. జింకల్ని వేటాడిన విషయం పది రోజుల క్రితమే గుండాల పోలీస్ అధికారులకు తెలుసని గ్రామస్థులు చెప్పడం గమనార్హం. గుండాల ఎస్సైకు ఈ వ్యవహారం మొత్తం తెలుసని సమాచారం. జింకను చంపిన వ్యవహారం వెలుగులోకి రావడంతో ఎస్సై రంగంలోకి దిగి విచారణ ప్రారంభించారు. ఏమైందో తెలియదు కానీ ఒక్కసారిగా విచారణ ఆగిపోయింది. దీంతో ఈ వ్యవహారం అక్కడితో ఆగిపోయిందనుకున్నారు. కానీ స్థానిక యువకులు ఫారెస్ట్ అధికారులకు సమాచారం ఇచ్చారు. దీంతో జింక వేట వ్యవహారం మళ్లీ వెలుగులోకి వచ్చింది . ఫారెస్ట్ అధికారులు విచారణ ప్రారంభించడంతో పోలీసులు కూడా రంగంలోకి దిగారు. కేసు నమోదు చేసి విచారణ ప్రారంభించారు. జనగామ డీసీసీ శ్రీనివాస్ రెడ్డి స్వయంగా ఈ కేసును పర్యవేక్షిస్తున్నారు. ఈ కేసు విచారణ కోసం ప్రత్యేకంగా మూడు బృందాలను ఏర్పాటు చేశారు. త్వరలోనే నిందితులను పట్టుకొని పూర్తి వివరాలను సేకరిస్తామని పోలీసులు చెబుతున్నారు. 

No comments:
Write comments