మరో వారం తర్వాతే ఇసుక

 

విజయవాడ, సెప్టెంబర్ 7, (globelmedianews.com)
సెప్టెంబరు 5 నుంచి కొత్త ఇసుక విధానం రాష్ట్రంలో అమల్లోకి వచ్చిన విషయం తెలిసిందే. కొత్త ప్రభుత్వం ఏర్పడటంతో దాదాపు 100 రోజుల నుంచి ఇసుక తవ్వకాలు నిలిచిపోయాయి. ఈ ప్రభావం నిర్మాణ రంగంపై తీవ్రంగా పడింది. నిర్మాణాలు ఆగిపోవడంతో భవన నిర్మాణ కార్మికులు ఉపాధికి దూరమయ్యారు. అంతేకాదు, ఇసుక ధరలు కొండెక్కి కూర్చున్నాయి. తాజాగా ప్రభుత్వం తీసుకొచ్చిన విధానం రాష్ట్రవ్యాప్తంగా అమల్లోకి వచ్చినా, నిర్దేశిత ప్రాంతాల్లో తవ్వకాలు, విక్రయాలు ప్రారంభమవ్వడానికి మాత్రం మరికొంత కాలంపట్టే సూచనలు కనిపిస్తున్నాయి. నదుల్లో వరద ప్రవాహం కారణంగా ఆన్‌లైన్‌లో బుక్‌ చేసుకునేందుకు సాంకేతిక సమస్యలు ఎదురవుతున్నాయి. 
మరో వారం తర్వాతే ఇసుక

బుక్‌ చేసుకున్నాక కన్ఫర్మ్ కాలేదని.. ఇసుక ఇంకా చేరలేదని, సీఎఫ్‌ఎంఎస్‌ డబ్బులు జమ చేసుకున్నట్లు సమాచారం రాలేదని వినియోగదారులు ఫిర్యాదు చేస్తున్నారు. వీటిపై దృష్టి సారించిన అధికారులు ఇసుక విక్రయాలను పెంచేందుకు ముమ్మరంగా కసరత్తు చేస్తున్నారు.వీలైనన్ని ఇసుక నిల్వ కేంద్రాల నుంచి విక్రయాలు మొదలుకావడానికి కనీసం వారం రోజులు పట్టే అవకాశం ఉందని అధికారులు పేర్కొంటున్నారు. శ్రీకాకుళం జిల్లాలోని వంశధార, నాగావళి నదుల్లో 12 రేవుల్లో ఇసుక తవ్వకాలకు ఏర్పాట్లు చేశారు. అయితే, ఈ రెండు నదుల్లోనూ వరద ఉద్ధృతంగా ఉండటంతో ఒక్క రేవులో మినహా మిగితా చోట్ల తవ్వకాలు ప్రారంభించలేదు.కర్నూలు జిల్లాలోని తుంగభద్రలో ఐదు రేవులను ఎంపిక చేయగా, నదిలో భారీగా వరద ప్రవాహం కొనసాగుతోంది. ఇక్కడ తవ్వకాలు జరగాలంటే కనీసం పది రోజులు వేచిచూడాల్సి పరిస్థితి ఉంది. గుంటూరు జిల్లా పరిధిలోని కృష్ణాలో 14 రేవులను ఎంపిక చేశారు. కానీ నదిలో ప్రవాహం ఎక్కువగా ఉండటం, ఎగువ నుంచి మళ్లీ వరద వస్తుందన్న అంచనాలతో ఇక్కడ కూడా వారం తర్వాతే తవ్వకాలు చేపట్టే అవకాశాలున్నాయి. ప్రస్తుతానికి మంగళగిరిలో ఏర్పాటుచేసిన డిపోలో మాత్రమే విక్రయాలు ఆరంభించారు.అనంతపురం జిల్లాలోని మూడు నిల్వ కేంద్రాల ద్వారా ఇసుక విక్రయించాల్సి ఉండగా.. వీటికి సంబంధించి ఇద్దరు కాంట్రాక్టర్లు ఏపీఎండీసీతో ఒప్పందం చేసుకోవడంలో జాప్యమైంది. ఇక్కడ మరో రెండు, మూడు రోజుల్లో విక్రయాలు మొదలయ్యే వీలుంది. గోదావరిలో వరద కొనసాగుతుండటంతో ఉభయగోదావరి జిల్లాల పరిధిలో దాదాపు 20 రేవులలో బోట్లలో వెళ్లి ఇసుక తవ్వి తీసుకొచ్చేందుకు అవకాశం కల్పించారు. ఈ ఇసుకను నిల్వకేంద్రాలకు తరలించి విక్రయిస్తున్నారు. అయితే, మళ్లీ గోదావరిలో వరద పెరుగుతుండటంతో దీనికి అంతరాయం ఏర్పడే అవకాశం ఉంది.

No comments:
Write comments