మానవత్వానికి మాయని మచ్చ

 

హైద్రాబాద్, అక్టోబరు 29 (globelmedianews.com)
రంగారెడ్డి జిల్లా హయత్‌నగర్ పోలీస్‌స్టేషన్ పరిధిలోని మునగనూరు గ్రామంలో కూతురే తల్లిని హత్య చేసిన ఘటనలో సంచలన విషయాలు వెలుగులోకి వస్తున్నాయి. ప్రేమ పేరుతో భవిష్యత్ నాశనం చేసుకోవద్దని చెప్పిన తల్లిని కీర్తి అనే యువతి మెడకు చున్నీ బిగించి దారుణంగా హత్యచేసింది. అనంతరం శవాన్ని మూడురోజుల పాటు ఇంట్లోనే ఉంచుకుని ప్రియుడితో రాసలీలలు కొనసాగించింది. అయితే తల్లి ఎక్కడని నిలదీసిన తండ్రిపైనే కీర్తి పోలీసులకు ఫిర్యాదు చేయడం కొసమెరుపు.డిగ్రీ చదువుతున్న కీర్తి గతంలో అదే ప్రాంతానికి చెందిన ఓ యువకుడితో ప్రేమాయణం నడిపింది. ఈ విషయం రెండు కుటుంబాల్లో తెలియడంతో గొడవలు జరిగాయి. వివాదం సద్దుమణిగాక ఆమె చంటి అనే యువకుడితో ప్రేమలో పడింది. సినిమాలు, షికార్లంటూ విచ్చలవిడిగా తిరగడాన్ని గమనించిన ఆమె తల్లి రజిత కూతుర్ని హెచ్చరించింది. 
మానవత్వానికి మాయని మచ్చ

దీంతో తన సంతోషానికి తల్లి అడ్డుపడుతోందని భావించిన కీర్తి ఈ నెల 19వ తేదీన ప్రియుడిని ఇంటికి రప్పించుకుంది. ఆమె తండ్రి శ్రీనివాస్‌రెడ్డి లారీ లోడుతో ఇతర ప్రాంతానికి వెళ్లడంతో రజిత ఇంట్లో ఒంటరిగా ఉంది. దీంతో చంటి ఆమె కాళ్లు చేతులు పట్టుకోగా.. కీర్తి తల్లి గుండెలపై కూర్చుని మెడకు చున్నీ బిగించి చంపేసింది.ఆ తర్వాత మూడు రోజుల పాటు తల్లి శవాన్ని ఇంట్లోనే ఉంచుకుని ప్రియుడితో రాసలీలలు సాగించింది. శవం దుర్వాసన రావడంతో అర్ధరాత్రి వేళ కారులో తీసుకెళ్లి యాదాద్రి జిల్లా రామన్నపేట సమీపంలోని తుమ్మలగూడెం వద్ద రైల్వేట్రాక్‌పై పడేసింది. మరుసటి రోజు కీర్తి తండ్రి శ్రీనివాస్‌రెడ్డి ఇంటికి రాగా తాళం వేసి ఉంది. భార్యకు ఫోన్ చేయగా ఎత్తలేదు. దీంతో ఆయన కూతురికి ఫోన్ చేయగా ఫ్రెండ్స్‌తో కలిసి వైజాగ్ టూర్‌కి వచ్చినట్లు చెప్పింది. దీంతో ఆయన తన బంధువుల ఇళ్లల్లో ఆరా తీశాడు. ఈ నెల 26న ఇంటికొచ్చిన కీర్తిని బాబాయ్ కృష్ణారెడ్డి ప్రశ్నించగా పొంతనలేని సమాధానాలు చెప్పింది. తల్లి గురించి తనకేమీ తెలీదని, ఆమె దగ్గర రూ.2వేలు తీసుకుని వైజాగ్‌ వెళ్లానని చెప్పడంతో తండ్రికి అనుమానం వచ్చి గట్టిగా నిలదీశాడు. దీంతో తన తండ్రి తాగొచ్చి రోజూ కొట్టడం వల్లే తల్లి ఎక్కడికో వెళ్లిపోయిందని హయత్‌నగర్ పోలీసులకు కీర్తి ఫిర్యాదు చేసింది.దీంతో కేసు నమోదు చేసుకున్న పోలీసులు శ్రీనివాస్‌రెడ్డి ప్రవర్తనపై బంధువులు, స్థానికులను ప్రశ్నించారు. ఆ దంపతులు చాలా అన్యోన్యంగా ఉండేవారని, ఎలాంటి గొడవ పడేవారు కాదని అందరూ చెప్పడంతో పోలీసుల కన్ను కీర్తిపై పడింది. ఈ క్రమంలో రజిత ఏమైందంటూ ఆమె మేనమామలు, బంధువులు కీర్తిని నిలదీయగా ఆత్మహత్య చేసుకుందని కట్టుకథ చెప్పింది. అమ్మ చనిపోవడంతో భయపడి తన ప్రియుడు చంటి సాయంతో కారులో శవాన్ని తీసుకెళ్లి ఎక్కడో పడేశానని చెప్పింది. కీర్తి పొంతనలేని మాటలతో అనుమానం వచ్చిన వారు పోలీసులకు సమాచారం ఇచ్చారు. వారు తమదైన శైలిలో విచారించగా ప్రియుడితో కలిసి తల్లిని చంపేసినట్లు అంగీకరించింది. ఆమె చెప్పిన వివరాల ప్రకారం హయత్‌నగర్ పోలీసులు రజిత శవం కోసం రామన్నపేట రైల్వే పోలీసులను సంప్రదించగా... గుర్తుతెలియని శవంగా భావించి దహనం చేసేశామని చెప్పారు.ఒక్కగానొక్క కూతురైన కీర్తిని తల్లిదండ్రులు ఎంతో గారాబంగా చూసుకునేవారని బంధువులు చెబుతున్నారు. వారి చుట్టాల పిల్లలు చాలామంది అమెరికాలో ఉంటుండటంతో కీర్తిని ఉన్నత చదువుల నిమిత్తం అక్కడికి పంపాలని ప్లాన్ వేసుకున్నారని తెలిపారు. చదువు పూర్తయ్యాక కీర్తిని అమెరికాలో నివాసముండే అబ్బాయికే ఇచ్చి పెళ్లి చేయాలని ఆమె తల్లి రజిత ఎంతో ఆశపడిందని, వాటినన్నింటినీ నాశనం చేసి కీర్తి కన్నతల్లినే దారుణంగా చంపేయడాన్ని బంధువులు, స్థానికులు జీర్ణించుకోలేకపోతున్నారు.

No comments:
Write comments